Kalaallit Nunaata aappagumiit 2012 ilanngullugu arfattassiissutissatut kissaatini arfanniarneq pillugu ataatsimiititaliarsuarmut, IWC-mut, maajip ulluisa 23-anni saqqummiuppai, arfattassiissutissatullu kissaatit taperserneqarlutillu ilaannit akerlilersorneqarput.
Assersuutigalugu Tunumi tikaagullittassanik ukiumut aqqaneq-marlunnik ukiuni tallimanut kissaateqarneq arfanniarneq pillugu ataatsimiititaliarsuup ilisimatuussutsikkut ataatsimiititaliaanit taperserneqarpoq.
- Tunumi tikaagulliit aqqaneq-marluk pisarineqarpata tikaagulleqassutsimut akornutaanavianngilaq, ataatsimiititaliaq nassuiaammini allappoq.
Tikaagulliit 200-t ukiumut ataatsimut pisassiissutigineqarnissaat, aappaagulu allannguisoqarnissaa ukiunut sisamanut, tassa 2009-miit 2012-ip tungaanut pisassiissuteqartoqarnissaa, nunatsinnit kissaatigineqarpoq.
Arfanniarneq pillugu ataatsimiititaliarsuup, ilisimatuussutsikkut ataatsimiititaliaata innersuussutigaa ukiumut ataasiugallartumut 170-it 230-llu akornanni amerlassuseqartunik pisassiisoqassasoq, aappaagu allangortinneqartussamik.
Tikaagulliusaallu ukiumut 19-it Kitaani ukiunut tallimanut pisarineqarsinnaanissaat allatut innersuussiffigineqarpoq, tikaagulliusaalli 14-it 26-llu akornanniittut Kitaani ukiumut pisarineqarsinnaanissaat innersuussutigineqarpoq.
Qipoqqarnik ikinnerpaamik qulinik Kalaallit Nunaat piumasaqaateqarpoq, pisassiissuteqartoqarsinnaanerali aappaagu aatsaat aalajangiiffigineqassaaq.
Arfiviilli ukiumut marluk ukiuni tallimani pisarineqarsinnaanissaat tapertaliullugu piumasaqaatigineqarpoq.
Arfivik 1938-mili eqqissisimatitaalluinnarpoq, ukiumulli tallimanik pisaqartoqarsinnaassasoq biologit innersuussutigaat.