Aamma tassa kollegiassaaruteqqipput!
Henriette Wille Qeqertarsuarmeersoq novemberip tungaannut Nuummi atuagarsortussaagaluarpoq, tallimanngorpamiilli naluaa sumunnarfissaqassanerluni.
-Tallimanngorpat ullaakkut qulinut hotelimiit anissuugut.
Henriette atuaqatissanilu paasitinneqarput Ilulissani SPS-imiit kollegianut qinnuteqaatit inortuissuneqarsimammata inissaqartinneqaratik.
Tamannalu SPS-imi allaffissornermut pisortap Lea Levisen-ip uppernarsarpaa.
-Tassa tusarparput kingusinaarussimagipput, paasitinneqarnikuunngilagut kollegianut qinnuteqarfissat killiligaanersut, siornatigut ataasiarluta qinnuteqaassulluta misilipparput sunalu tamarmik aporfeqanngimmat pisussaannartut isigisimallutigu
Lea Levisen oqarpoq.
Kollegiat allaffeqarfiat attaviginiarnera SPS-imiit ajornartorsiutigineqarpoq.
-KAF-i toqqaannartumik attavigiuminaatsittorujussuuarput, akisarput qarasaasiatigut atortut ajoramik paasitissanatalu kollegiat inissaqarnersut ulikkaarnersulluunniit.
Aatsaat ullumi paasivarput ilumut inissaqanngivissortut. Massakkut nalilersorneqalerpoq ilinniartut angerlaannassanersut kingusinnerusukkullu atuariartorlutik
SPS-imi allaffissornermut pisortaq Lea Levisen oqarpoq.
KAF-imiit oqaaseqartitsiniaraluaratta ullumikkut iluatsinngilarput.
