Aamma illit sukkulernikkaajuit?
Nunatta kujataaniit avanersuarmut aammalu tunumi angerlarsimaffinni sukkut atugaasorujussuupput. Sukkutukkatta 75 procentii tassaapput kaffimut, tiimut sodavandimullu tungusunnissaatigineqartartut. Tamanna pitsaasuunngilaq qaarsillassutaasinnaannginnamimi.
- Takornartaanngilaq inuit tiitorfinnik arfinilerianngikkunik arfineq pingasoriarlutik ullormut kaffisortarnerat tamatigullu ilaasa sukkulingaatsiartarpaat. Peqqissuunissaq eqqarsaatigalugu tamanna pitsaasuunngilaq inuillu Kalaallit Nunaanniittut kajumissaaginnarsinnaavakka ileqqoq tamanna allanngortinniaqqullugu. Arriitsunnguamik sukkumik atuineq annikilliartortinneqarsinnaavoq naggatigullu sukkulissaartoqarsinnaalluni. Sukku peqqinnartuunngilaq, peqqinnissaq pillugu Phd. Charlotte Jeppesen Syddansk Universitetimeersoq KNR.gl-mut oqarpoq. Taanna nunatsinni sukkulersortarneq pillugu misissuisimavoq.
Sukkutugarineqartartut 36 procentiat kaffimut tiimullu akuliunneqartartumeersuuvoq 30 procentilu sodavandimeersuulluni. Kisitsisit taakku Danmarkimi sukkunik atuinermut sanilliullugit qaffasinnerusujussuupput. Kisitsisilli taakku inersimanerusut akornanni takussaapput. Inuusukaat neriunartoqarnerupput.
- Assut nersualaarpara Kalaallit Nunaanni nerisaqarnermut siunnersuisooqatigiit paasititsiniaallutik suliarisimasaat. Tamakku atuarfinni meeqqerivinnilu sunniuteqarput kingusinnerusukkullu ilaqutariit iluanni sunniutilerumaarlutik. Angajoqqaat aamma eqqarsalersinneqarsimassapput meeqqamik meeqqeriviat sukkutorfiunngitsoq paasigaangamikku. Siunissaq ungasinnerusoq isigalugu Kalaallit Nunaanni tamanna neriunaateqartutut isigaara. Kisianni pissutsit ullumikkutut itsillugit inuit amerlasuut pualavallaalernertik pissutigalugu sukkortunngornissaat ilimanarpoq, Charlotte Jeppesen oqarpoq.