Aamma illit nualluppit?

Inuppassuit qaammatini kingullerni marlunni nualluttorsuupput. Ersiutit nalinginnaanerpaat tassaapput qasoqqarnersuaq, niaqorlunneq saannerinerlu. Aamma amerlasuut nasserissutigisimavaat, timmillutik meriartarlutillu.

Naak amerlasuut virusinit marluusunit eqqugaasimagaluartut, tamanna Dronning Ingridip Napparsimmavissuanik artukkiisimanngilaq.

- Isumaqarpunga inuit imertorluarlutik pamolitorlutillu kissarneqarnertik apparsarlugu anniarnerminnillu nipaallisaallutik imminnut ikiorsinnaallutik pikkoriffiginerulersimagaat, Dronning Ingridip Napparsimmavissuani nunap immikkoortuani nakorsaaneq Jesper Olesen KNR.gl-imut oqarpoq.

Taassuma oqaatigaa, virusit assigiinngitsut marluk tuniluuttut, inuillu tunillatsissimasut sakkortuumik eqqugaasinnaasartut.

Nualluutip aappaa nualluutaavoq nalinginnaanerusoq, taassumalu ersiutigai qasoqqanerujussuaq, niaqorlunneq kissarneqarnerlu. Nualluutillu aappaa taaneqareersutut nasserititsisarpoq, meriartitsilluni timminnarlunilu.

- Taamatulli napparsimasut ikiorpiarsinnaanngilagut, Jesper Olesen erseqqissaavoq.

Virusit marluusut tunillannartupilussuunertik assigiissutigivaat. Inuillu suli napparsimallutik suliartoraangamik inuppassuit tunillassinnaasarpaat. Taamaammat nakorsap siunnersuutigaa napparsimalersimagaanni angerlarsimaannartoqartassasoq, tamannalu sapaatip akunnerata missaanik sivisussuseqartarpoq.

- Tunillatsikkusunngikkaanni assat asattarnissaat aamma pingaaruteqarpoq. Assanulli qaqorsaat kisiat atussallugu naammangilaq. Spritti bakteerissanut atussallugu pitsaanerpaavoq, Jesper Olesen siunnersuuteqarluni oqarpoq.

Nuallullutik napparsimasut ilarpassui aamma quersukulullutik napparsimanerminni allatut inooriaaseqalernissartik eqqarsaatigisimavaat.

- Arlallit nuallunnermik kingorna pujortassaarsimasut naapippakka, Jesper Olesen oqarpoq.