Per aamma Per ataatsimeeqatigiissapput

Amerikamiut sakkutuuisa isertortumik timmisartumik angallassisarnerat, amerikamiut sakkutuuisa timmisartuata B-52-ip qaartartumik brintbombimik useqarluni 1968-imi Thulep eqqaani nakkarnera, taamatullu illersoqatigiit NATO-mi ilaasortat Islandimi qanittumi ataatsimiinnerat Per Stig Møllerip Per Berthelsenillu ataatsimiinneranni oqaluuserineqassapput. Aviisip sermitsiap nittartagaani tamanna allaaserineqarpoq.

Per Berthelsen siorna septembarip qaammataani naalakkersuisunut ilaasortanngornermi kingorna danskit nunanut ministeriat Per Stig Møller ataatsimeeqatiginiarlugu kissaatigisimavaa. Tamannalli piviusunngorsinnaasimanngilaq, Per Stig Møller periarfissaqarsimanngimmat. Kalaallit Nunaannit pingaaruteqartutut pingasut oqaluuserineqartussatut kissaatigineqarput, tassalu amerikamiut sakkutuuisa isertortumik paasiniaasartuisa, CIA-p, timmisartumik angallassisarsimanerat, Thulep eqqaani timmisartorsuup qaartartumik brintbombe-mik useqarluni nakkarsimanera taamatullu illersoqatigiit NATO-p Islandimi piffissami qanittumi ataatsimiissimanerat. Ataatsimiinnermi tassani Kalaallit Nunaat ilaatinneqanngilaq, tamannalu Per Berthelsenimit ajuusaarutigineqarpoq. Kalaallit Nunaani ataatsimiinnermut qaaqquneqarsimannginnera tupigusuutigalugu saqqummiukkumaarpara,

Per Berthelsen aviisimit Sermitsiamit apersorneqarluni oqarpoq.