Aamarsuarsiorfimmi mattussaaqqasut ajunaarput

Aamarsuarsiorfimmi qaartoortoqaqqimmat, annassimasinnaasunik nassaarnissamut neriuut nunguvilluni nunguppoq. Qaarusummi qaarneq siulleq tallimanngormat pivoq, aamarsuarsiortullu mattullugit.

- Ilisimannittunit paasisakka naapertorlugit mattussaasut tamarmik ajunaarsimanissaat qulariunnaarparput, politiit naalagaat, Gary Knowles, ullaaq oqarpoq, nangipporlu:

- Kingullermik qaartoqarmat uanga nammineq qaarusuup silataaniippunga, amiilaarnaqaaq, qaarnermi kingulleq siullermilluunniit sakkortuneruvoq, saliinissarput maanna tullinnguuppoq, nassuiaavoq.

Qaarneq kingulleq pillugu nassuiaasoqareersorlu ilaqutaasut aliasoqisut qaarusuup eqqaaniit qimagussorput.

New Zealandimi ministeriuneq, John Key, tupinnartumik pisoqarnissaanik allatuulli neriussimagaluartoq, tusagassiortunik ullumi katersortitsinermi ima oqarpoq:

- Inuiaqatigiinni una ajunaarnersuuvoq. Pisimasuuvoq angutit ilaqutaannut, suleqataannut ikinngutaannullu, minnerunngitsumillu uatsinnut inuiaqatigiinnut, alianarluinnartoq.

Gassinik assigiinngitsunik qaarusummi ulluni tallimani ikkussuisoqareersorlu qaartoorneq pivoq, gassit ulorianartorujussuit taakku qaarusuk tamaat ikuallatsilerpaat.

Aamarsuarsiortut tallimanngormalli mattussaammata attavigineqarsimanngillat. Aappassaanilli qaartoortoqarnissaata tungaanut soorunalimi neriuttuaraluarput.