Aallartoorfigaluni ajunaarpoq
Piniartoq Kangaatsiarmiu, 56-inik ukiulik, umiatsiaaqqaminik nunaqarfiup Attup avataani tallimanngormat piniarniartilluni imminut aallartoorfigaluni ajunaarpoq.
Aallaat imaarneqanngitsoq piniartup umiatsiami naqqaniitissimavaa, mallingaatsiarneralu pissutaalluni piniartup aallaasaa nammineerluni anarrunnerminit aallartoorsimavoq, piniartorlu 56-inik ukiulik quttoraatigut eqqorlugu.
Umiatsiaaqqami ikiueqqaartoqarsimanngilaq, piniartulli aappaa sukkaqaluni tamatsaat nunamut ikiortissarsioraluarpoq. Ingerlaarnera minutsinik 20-nik sivisussuseqarsimalluni, uterneranni piniartoq imminut aallartoorfigisoq ikiminik aanaartoorsimaqisoq nunamut apuunnerminni toqusimavoq.
Aasianni politiit sakkortuumik tamanut inassutigaat aallaasit tamatigut imaajartaqqullugit.
- Malittariasassaqanngilaq aallaasit imallit umiatsiaaqqap naqqaniitinneqartarnissaannik. Kisianni inassutigissavarput aallaasit tamatigut imaarneqartarnissaat, Aasianni politeeqarfimmi ittuusoq, Gert Jakobsen oqarpoq.
