Aallartitaq: Pituffimmi sakkutooqarfik USA-mut suli pingaaruteqarpoq
![](/sites/default/files/styles/image_934x467/public/article_images/thulebasen_576338a_1.jpg?itok=L7fKAr9g)
Amerikamiut nunatsinnik soqutiginninnerat sorsunnerup nillertup nalaani sakkutooqarnermut tunngassuteqarneruvoq. Qarmarsuup uppisinneqarnerata kingorna soqutiginninnera millivoq, maannali soqutiginninnera annertuseriapiloorluni. Tamannalu arlalinnik peqquteqartoq Ruffus Giffordip oqaatigaa.
- Siliap pissusiata allanngoriartornera, aningaasaqarnikkut periarfissat assigiinngitsut kiisalu Issittumut tunngatillugu unammilligassat annertuut pissutigalugit. USA-p Issittoq pimoorullugu ukkarisarilersimavaa, Kalaallit Nunaallu tamatumani pingaarutilimmik inissisimavoq.
AAMMA ATUARUK VIDEO USA-p aallartitaata annaassiniartut malittarigai
- Kunngeqarfimmi Danmarkimi aallartitatut isumaqaprunga Issittoq minnerunngitsumillu Kalaallit Nunaat aallartitaqarfimmut pingaaruteqaleriartuinnartut, Ruffus Gifford KNR-imut oqarpoq.
Aallartitap ilinniartut ataatsimeeqatigisimavai aammalu imaatigut annaassiniartartut, SAR, umiarsuarmut alapernaarsuummut Knud Rasmussenip ilaalluni annaassiniarlutik sungiusartut malittaralugit.
Sermersualiassaaq
Giffordip amerikamiut sermersuarmi ilisimatusarfiat Summit Camp tikeraassavaa.
Aallartitaq kingulleq nunatsinniikkami Pituffimmi sakkutooqarfimmut tikeraarpoq, USA-llu pilersaarusiornikkut sakkutooqarnikkullu Kalaallit Nunaanni soqutigineqarnera aamma oqaatigaa.
- Amerikamiut Pituffimmi sakkutooqarfiat suli pingaaruteqarpoq. Inuunermi naapitassani allanituulli aarlerinarsinnaasut ullumikkut piusut tamaasa pilersaarusiorfigineqartariaqarput, ukiut 20-t matuma siorna qanoq inissisimasoqarnera aallaaviginagu, taamaattumillu suliat aamma piffissamut naleqqussarneqassapput.
- Pituffiup amerikamiut sakkutooqarnikkut suliaannut pingaarutilimmik inissisimajuarnissaa qularutiginngilara, ineriartornerli malittariuartariaqarparput naleqqussarfigalugulu, soorlu ullumikkut taamaaliortugut, Rufus Gifford oqarpoq.