ASSIT Aallarnisaasup raajanik ammaloqisaaliaanik kunngikkormiut piseqqaartuusut
Suliffeqarfeeraq Nunatsinni sorlaqartoq forårsrullinut eqqaanarsinnaasunik ammaloqisaanik raajanik imalinnik "Gung Go"-mik taagukkaminik tunisassiaqarpoq.
Raajanik ammaloqisaaliat Aarhusimi sapaatit-akunneri marluk matuma siorna Food Festivalertoqarnerani akeqanngitsumik ussigassatut sassaalliutigineqarput, ussiisullu ilagaat Prins Henrik.
Prinsip raajanik ammaloqisaaliat siatat mamarsaatigisimannguatsiarpai ullummi pingasut qaangiummata kunngikkormiut umiarsuaanni Dannebrogimi qaaqqusanut 40-nut ammaloqisaanik 300-nik inniminniivoq.
Suliffeqarfimmik pilersitsisuupput Allan Chemnitz Nuummeersoq nulialu thailandimeersoq, Pakamas, taakkulu igasumik suleqateqarlutik raajat qalliutissaannut periaasissamik eqqortumik nassaarniarsimapput.
Aappariit Nuummit Korsørimut siorna nuupput, Danmarkimilu neriniartarfinnut, niuertarfinnut inuinnarnullu kalaallit tunisassiaannik pilersuiniarlutik suliffeqarfik Greenland Food pilersippaat.
Ammaloqisaat raajanik nunatsinneersunik akullit saniatigut aamma græskarit atortarpaat. Siunissamilu aamma saarulliit saattuallu nerpiinik imalinnik tunisassiulissagunarlutik.
