Tupinnartoq: Aallaasersortoqanngitsoq tigusarinnittoqanngitsorlu
Tungujortumik ikittaartut, politiit aallaasilisartut assersuisullu. Qaarsunnguani najukkat ilaata eqqaanni ullaaq manna taama pisoqarpoq. Politiit sisamanngornermi ullaakkut nalunaaqutaq 8.00 aallaasersortoqarneranik kalerrinneqarput.
Politiit suliami suliaqartuisa pasisaq nalunaaqutaq 10.30-p missaani tigusariartorpaat. Sumiiffimmi tassani allaasersortutut pasineqartoq, tigusarineqarsimasoq politiit tusagassiutinut nalunaaruteqarput.
Politiit ullup-qeqqata kingorna nutaamik paasissutissiipput. Nalunaaruteqarnerat naapertorlugu aallaasersortoqarsimanngilaq, qummoroortartortoqarsimallunili. Politiit naapertorlugit qaarpalunnerit innuttaasunit politiinut nalunaarutigineqartut allaasersornerunatik qummoroortartut nipigaat.
AAMMA ATUARUK Nuussuarmi aallaasersortoq politiit tigusaraat
Oqaluttuarli ingerlaqqippoq. Angummi tigusarineqartoq, tigusaasimanngitsoq politiit pigaartuat, Kunuk Frederiksen KNR-imut oqarpoq. Taannalu aallaasersortumut/qummoroortartunut attuumassuteqanngilaq.
- Taanna suliamut allamut tunngatillugu oqaloqatigerusutaraarput sumiiffimmilu tassaniilluni. Taanna killisiorneqassammat politeeqarfiliaanneqarpoq, killisiorneqareeramilu politeeqarfimmiit nammineq ingerlaqqippoq, pigaartut pisortaat tigusarinnissimannginneq pillugu taama oqaluttuarpoq.
