Aallaasersorniaraluartoq iperagaavoq
Allattoq Mads Lynge
Nuummi inissiat ilaanni Ceresvej-imiittumi angut aallaasilisarluni arnamik ippassaq qunusaarisimammat politiit orniguttariaqarsimapput.
Angut 65-inik ukiulik Blok K-milu najugalik, politiinit tigusarineqarpoq.
Arnap angut nalunngisarisimavaa, angullu tigusarineqartoq aalakoorsimalluni.
Angut ullaaq killisiorneqarpoq, kinguninngualu iperagaalluni.
Pinerluttulerinermi inatsimmik unioqqutitsisimasutut angut unnerluunneqarumaarpoq, suliaq kingusinnerusukkut naammassineqarumaarpoq.
Angut aallaariarsimanngilaq, politiinullu tunniutiinnarsimalluni.