Aallaarsimaarneq aallaasersornermik kinguneqartoq
Aallammik qunusaarineq Qooqquni, Nuummiut arlallit aallaarsimaffigisartagaanni, politiinut sapaatip ullaassaani kalerriutigineqarpoq.
Politiinit paasissutissat naapertorlugit angut 48-nik ukiulik assortuunnerup kingorna kamalluni illuaqqamit, angutit allat pingasut isersimaffigisaannit, anisimavoq. Ilisimannittut nassuiaanerat naapertorlugu angutip aallaasini aasinnarlugu, illuaqqap angutit pingasut isersimaffigisaata silataani ataasiarluni seqqorsimavoq.
Politiit nalunaaqutaq 0245 pisoq pillugu kalerrinneqarput. Politiit angallataat Sisak IV politiinik marlunnik ilaasoqarluni Qooqqumut ingerlaannaq aallartinneqarpoq.
Nalunaaquttap akunnera ataaseq qaangiummat politiit angallataat Qooqqumut tikippoq angullu ilaminit aallaammik arsaarneqarsimalluni aalajangerneqarsimasoq tigusarisinnaasimallugu.
Angut inuit inuunerannik ulorianartorsiortitsinissani siunertarisimanagu politiinut nassuaasimavoq, sissallu tungaanut inoqannginnersamut seqqorsimanerarluni.
Angut eqqartuussivimmut ullumi sassartinneqarpoq ullunilu 25-ni tigummigallagassanngortinneqarluni.
