Aalisartut ulluat kingumut malunnartinniarneqarpoq nersornaasiinertalimmik
Ukioq manna katillutik inuit arfinillit sinerissami illoqarfinni assigiinngitsuneersut Niels Carlo Heilmannip aningaasaateqarfianit nersornaaserneqassasut, KNAPK-p siulittaasua Peter Olsen tusagassiuutinut allappoq. Maligassiuisimasutut nersorniarneqartut uku innersuunneqarput: Henrik Petersen, Paamiut, Frans Petersen, Maniitsoq, Marius Olsen, Sisimiut, aamma Otto Storch Aasiaat. Nersornaat deplomitalik 5.000 koruuninillu aningaasartalik taaneqartunut tunniunneqassapput.
Inunnik annaassisimasutut nersorniarneqartut inuit marluk, uku nersorniarneqarput: Simion Løvstrøm, Uummannaq, kiisalu Ole Qvist aamma Uummannameersoq. Taakkua aamma Nersornaat diplomitalik 5.000 koruuninillu aningaasartalimmik tunineqassapput.
Ukioq manna 56-issaat Aalisartut Ulluat Nuummi Aalisartut ulluat malunnartinniarlugu Katersortarfimmi nereqatigiinneqassaaq, kingorna qittannertalimmik. Naalakkersuisut siulittaasuat Hans Enoksen, aamma Aalisarnermut naalakkersuisoq Finn Karlsen immikkut qaaqquneqarsimasut, KNAPK-mi pisortaq John Biilmann Radioaviisimut ilisimatitsivoq.