Aalisartut pisaminnik Arctic Green Foodip tunisassiorfiinut tuniseqqissinnaalerput

Aalisartut Arctic Green Foodip tunisassiorfiinut tunisisinnaanersut piffissami kingullermi qularnarsisimagaluarpoq. Attumi tunisassiorfiup isaariaanut allagartami nivinngarneqarsimasumi paatsuugassaanngitsumik allassimagaluarpoq tunisassiorfik matusimasoq, "tunisaqartarnermut ukiup sinneranut aningaasaliussat nungullugit atorneqarsimanerat" pissutigalugu.

Sulisut aqaguani Maniitsumi pikkorissarnerup nalaani nalunaarfigineqarput Arctic Green Foodip tunisassiorfiini sulisut tamarmik januaarip aallaqqaataaniit soraarsinneqartut, Namminersorlutik Oqartussanik kiffartuussinermik isumaqatigiissutip suli isumaqatigiinniutigineqaqqissimannginnera pissutigalugu.

Maannali tassa aalisartut, piniartut sulisullu Arctic Green Foodip tunisassiorfiinit qulingiluaasunit isertitassamikkut inuuniarnermilu tunngavimmikkut isumalluuteqartut nuannersumik tusagassaqalerput. Suliffeqarfiup pisortaa Johanne H. Petersen oqarpoq:

- Saarulliit qeeqqallu tunisaanerat ammaqqipput, Attumi, Napasumi, Qassimiuni Narsarmiunilu. Kiffartuussinissamut isumaqatigiissutissamut tunngatillugu, isumaqatigiinniarnerit aallartereermata, taassunga tunngasumik oqaaseqarsinnaanngilanga, Johanne H. Petersen oqarpoq.

Arctic Green Foodilli Kangerlussuarmi tunisassiorfia januaarip 15-ianni umimmanniarneq aallartippat aatsaat ammassaaq.