Aalisartut Piniartullu Partiiata IA tapersersorpaa
Folketingimut qinersinermi Aalisartut Piniartullu Partiiata ilaasortatik IA-p qineqqusaartitaannik qinerseqquaat.
Allattoq Elisa Isaksen
novembarip 02-at 2007 15:17
Partiip siulittaasua, Leif Fontaine tusagassiuutinut taama nalunaarpoq, ajuusaarutigalugulu partii folketingimut qinigassanngortitsinissaminut atsiornernik katersinissaminut periarfissaqarsimanngimmat.
Kisianni partii qinigassanngortitaqarsimagaluaruni Kalaallit Nunaanni avatangiisit, suliffeqarneq silallu pissusaata allanngoriartornerata sunniuteqarnera qallunaanut tusaqqusaarutigineqarnissaat qineqqusaarutigissagaluarpaa.
Partiip Folketingimi Atlantikup Avannaani Suleqatigiit tapersersorpaat, Kalaallit Nunaata Nunat Tamat Arfanniarneq Pillugu Ataatsimiititaliarsuaani ilaasortaalernissaa kissaatigaa, kiisalu Kalaallit illersornissamut upalungaarsimatitaqalernissaat anguniarpaa, Leif Fontaine nalunaarpoq.
