Aalisartut piniartullu paasiniaavigilereerpaat
Ilulissani Sisimiunilu aalisartut piniartullu siunissami qanoq takorluugaqarnersut paasiniaavigineqalereerput.
Naamik uanga aalisartutut atuarnikooreerama aalisartuuginnassaanga
Taamatut oqarpoq aalisartoq Nuka Olsen.
Tassa Ilulissat kommunea aalisartunut apeqqutinik immersugassanik nassiussaqarsimagami 47-nit massakkut akineqareersimasunik.
Ilulissallu kommuneanni aalisartutut piniartutullu inuutissarsiuteqartutut 281-it nalunaarsorneqarsimasut Ilulissat illoqarfianni nunaqarfiinilu nassissorneqarsimapput.
Ilaatigut kajuminnartumik takkuttoqassagaluarpat allamut saannissaminnut soqutiginnillutik piareersimasut akissutini takuneqarsinnaareersoq oqaatigineqarpoq.
Aalisartullu piginnaanerisa periarfissaasalu nalunaarsuutaat aamma taamaasilluni pigineqalissapput.
Ilulissani Inuutissarsiornermut ataatsimiitsitaliami siulittaasoq Palle Jeremiassen oqarpoq aallaqqaammut nunami suliffiit sulisussaarunneqartartut sulisussaqartinneqalernissaat anguniarlugu apersuisoqartoq imalu nangippoq:
”Sulisussanik annertoorujorujummik atorfissaqartitsineq pilertussaavoq nunarput tamakkerlugu aatsitassarsiornikkut taavalu aamma nunami suliffitsigut piorsaanertigut assigiinngitsutigut sulisunik amerlasuunik pisariaqartitsineq tassaniippoq tassunga tunngatinnerullugu taanna suliaq aallartissimavarput”.
Apeqqutilli akissutissanik immersugassartallit Ilulissat kommuneata sanaarinngilai, tassami Sisimiut Inuutissarsiornermut siunnersuisoqatigiiffiata suliarisimammagit, Sisimiuni aalisartunut agguaassorsimavai aqagulu ulloq akissuteqarnissamut periarfissatut kingullertut taallugu utertitassanngortissimallugit.
