Aalisartut periarfissarissaarnerunissartik kissaatigaat
Sinerissamut qanittumi raajarniarnerup aaqqissuussaanera pillugu KNAPK aamma Royal Greenland assigiinngitsunik siorna novembarimi nalunaarusiami innersuussuteqarput, innersuussutigineqartullu amerlasuutigut aalisartunit taperserneqarlutik.
Aalisariutit sinerissamut qanittumi atorneqartartut aserfallassimavallaarnerarneqarput, aserorterneqarnissaannullu tapiissuteqartoqartalernissaa ujartorneqarluni.
Sinerissamut qanittumi raajarniarnermi angallatit angissusaat naapertorlugit pisassiisarnerit atorunnaarsinneqassapput, angallatillu sinerissamut qanittumi aalisartussat takinerpaaffissaat 27 meteriussasoq siunnersuutigaat.
Raajaqassutsip appariartuinnarnissaa ilimagineqarmat, nungusaataanngitsumik aalisarnissaq pingaartinneqarpoq.
Ataatsimiititaliaq susassaqartunit ilaasortaaffigineqartoq isumasioqatigiissitsinerup nalaani pilersinneqarpoq, sinerissamut qanittumi raajarniarnerup ataatsimiititaliamit malinnaavigineqarnissaa siunertaalluni.
Isumasioqatigiissitsinermi siunniussat piaartumik suleriaqqinnissami iliuusissatut ilusilerlugit Naalakkersuisunut saqqummiunneqarnissaat ataatsimiititaliap aamma naammassiniagassaraa.