Aalisartut nipaatsumik akerliupput
Aalisartut piniartullu killilersorneqartuarnertik pillugu akerliussutsimik takutitsipput. Nuummi Aalisartut Piniartullu Peqatigiiffiata nipaatsumik akerliussutsimik takutitsinerat nalunaaquttap akunneranik affarmik sivisussuseqarpoq.
Allattoq Najaaraq Egede
juunip 30-at 2010 13:25
Nuummi aalisartut Piniartullu Peqatigiiffiat NAPP allagartarsualisarlutik Katuap saavani ualiartoq marlunut katersuupput.
- Aalisartut piniartullu atukkavut ilungersunarsigaluttuinnartut pillugit oqartussanut apuusserusuppugut, Lars Mathæussen, NAPP-mit oqarpoq. Taanna ICC-p ataatsimeersuarnera aamma peqataavoq.
Allagaqaatitik ICC-p Kalaallit Nunaanni siulittaasuanut Aqqaluk Lyngemut apuuppaat.
- Allakkat tiguagut. Tusaatissatut tiguagut, uagummi siunnersuisoqatigiiffimmi Nuummi aalisartut piniartullu akuliuffigisinnaanngilagut. Taamaammat allakkat nunatta naalakkersuisuinut ingerlateqqippagut, Aqqaluk Lynge oqarpoq.
Nipaatsumik akerliussutsimik takutitsineq nalunaaquttap akunnerata affaa qaangiummat taamaatinneqarpoq.
