Aalisartut marluk qulimiguulimmit annaanneqarput
Aalisartut marluk umiatsiartik qimallugu timmisartumut kivitsissut atorlugu ikineqarlutik tallimanngormat unnukkut annaanneqarput.
Aalisartut taakku marluk periarfissat allat misissoraluareerlugit allatut ajornartumik ikiortissarsiortariaqarsimapput Ilulissani kangiata sullua sikumit asserneqarmat. Angallatit allat ikiuukkiartornissamut periarfissaqarsimanngillat.
- S-61 Kangerlussuarmiit aggertinneqarpoq taassumalu unnukkut arfineq pingasut missaanni aalisartut taakku Ilulissanut oqquppai. Qulimiguulimmi nakorsaq, portøri politeerlu ilaatinneqarput ajortoqassagaluarpat upalungaarsimassutitut. Qujanartumik aalisartut taakku tamarmik ajunngillat sillimaniarnermullu atortut pisariaqartut pisimallugit, vicepolitikommisær Leo Thelin oqarpoq.
Upalungaarsimanissamut isumaqatigiissutip nutaap januaarip aallaqqaataani atulernerata kingorna S-61 atorlugu annaassiniarnerit una siullersaraat.
- Qujanartumik ulloq taanna silagippoq. Annaassiniartut sila taarsereeraluartoq pilertortumik aalisartut sumiissusersivaat, Leo Thelin oqarpoq.
