Aalisartut: Kangaatsiap eqqaani aalisagaqarluarpoq

Aalisartoq Karl Lundblad Kangaatsiameersoq ima oqarpoq:

- Kangaatsiap kommuuniata pisuussutai 1960-ikkunili annissorneqartuarsimapput. Aalisakkat, raajat, assagiarsuit, nipisat allarpassuillu. Tunitsiveeruppat, taava pisuussutit tamakku aatsaat iluamik annissorneqalissapput. Tamanna aalisartorpassuit eqqorneqassapput ajornerpaarpaamik. Akiligassatigut, sutigut tamatigut, aalisartoq Karl Lundblad oqarpoq.

Niaqornaarsummiup Julius Jeremiassenip matusinissaq aamma iluarinngilaa, taannami oqarpoq tamaani saarulleqarluartoq:

- Massakkut pujorassaarpugut, akerput aanngassaarpoq. Aalisarneq ingerlaannarsinnaavoq, puisilli akornutaallutik. Puisit peeruteriarpata qanorsuaq aalisalissapput. Bundgarnersortut juullilivissoq tikipput saarullinnik pisaqarluarsimallutik. Oqartoqarsinnaanngilaq aalisagaqanngitsoq, aalisartoq Julius Jeremiassen, Niaqornaarsummiu, taama oqarpoq. Royal Greenlandip 2007-2008-mi naatsorsuutaanni amigartoorutaasut 78 millionit ilaat 20 millioni koruunit nunaqarfinni tunitsivinnit aallaaveqarput.

Tunitsiviit ammatiinnarneqassappata minnerpaamik amigartoorutit 20 millioni koruunit matussusernissaat pisariaqartinneqassapput.