Kangaatsiami aalisartut tunisinissamut periarfissanik pitsaanerusunik ujartuisut
Taamaattumik aalisartut aalisarnermut naalakkersuisumik, aalisartut piniartullu kattuffiannit KNAPK-mit aamma Royal Greenlandimut sinniisunik peqateqarlutik Attumi ullumi pingasunngornermi isumasioqatigiipput.
- Neriuutigeqaarput uani isumasioqatigiinnissaq tikkuussiumaartoq qanoq siunissaq qanittoq eqqarsaatigalugu tunisassiornerup qanoq pitsaanerusumik ingerlatilersinnaanera arlaatigut isummersorfigalugulu periarfissanik nassaarfiujumaartoq, Ole Frederiksen Attumi aalisartut piniartullu peqatigiiffianneersoq taama oqarpoq.
Royal Greenland Kangaatsiami eqqaanilu nunaqarfinni saarullinnik tunitsivigineqarnermini ukiuni 2012-imit 2017-imut annertuumik qaffariaateqarfigineqarpoq.
Suliffeqarfissuarmummi Namminersorlutik Oqartussanit pigineqartumut Kangaatsiami tunisassiorfimmut aamma Attumi, Ikerasaarsummi Niaqornaarsummilu tunitsivinnut tunisat piffissami tassani 400 procentinik qaffariaateqarput.
Aalisagaqarallarnera atorluarusuppaat
Aalisartulli isumaqarput tunisassiorfinnut suli tunisaqarnerusinnaallutik.
Taamaattumik tamaani aalisartut annertunerusumik tunisaqarsinnaanissartik ujartuiffigaat, aalisarnermillu suliaqartut allat isumasioqatiniarlugit aggersarsimallugit.
- Naluneqanngitsutummi peqassuseq aamma ataavartumik piuneq ajorpoq. Taamaattumillu peqarallarnerani qanoq sumiiffimmut aamma minnerunngitsumik iluaqutaasinnaanerisa annertusarnissaat tassani kissaatiginaqaluni, Ole Frederiksen oqarpoq.
Pinngortitaleriffik Kangaatsiap eqqaani ukiuni kingullerni marlunni saarulleqassutsimik misissuisimavoq. Kisianni misissuinerit ukiuni marlunni kingullerni taamaallaat ingerlanneqarsimammata Pinngortitaleriffimmit Kangaatsiap eqqaani saarulleqassuseq naliliiffigineqarusunngilaq.
Taamaattorli Pinngortitaleriffimmit uppernarsarneqarpoq Pinngortitaleriffiup angallammik misissuisarneri naapertorlugit Qeqertarsuup Tunuani saarulleqassuseq ukiuni kingullerni qulini annertusiartorsimasoq.
