Pisassiissutit tamanut saqqummiunneqartut: Aalisartut aqqaneq marluk aalisagartassiissutinik qinnuteqarsimapput
Inuussutissarsiutigalugu aalisarnermik aallartikkusuttut, aalisartut nutaat aqqaneq marluk, Naalakkersuisunit tamanut saqqummiunneqarsimasunik pisassiissutinik qinnuteqarsimapput. Qinnuteqaatilli suli suliarineqartut, tassungalu atatillugu qaqugu aalajangiisoqarnissaa oqaatigineqarsinnaanngitsoq, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik nalunaarpoq
Naalakkersuisut decembarimi 2024-mi aalajangerput, aalisartut nutaat – immikkut inuusuttut aallartitsiniartut – periarfissinneqassasut. Inuusuttut inuussutissarsiutigalugu aalisarnermut aallartisarnissaat ajornakusoortoq, aalisarnermut inatsimmut oqallinnerni arlalinni ersarissumik tikinneqartarmat, aalajangiinermut tamanna aallaavigineqarpoq.
Taamaattumik qalerallit 4.600 tonsit, saarulliit 1.950 tonsit aammalu nataarnat166,6 tonsit, kitaani sinerissamut qanittumiit avasinnerusuni inuussutissarsiutigalugu aalisartunut pisassiissutigineqarsimapput. Qinnuteqarnissamut killigititaasoq tassaasimavoq apriilip 30-at 2025.
Maanna qaammatit pingasut qaangiunneranni, suliat suli suliarineqarlutik ingerlasut, maannakkullu oqaatigineqarsinnaanngitsoq qaqugu aalajangiisoqarnissaa naatsorsuutigineqarsinnaanersoq, naalakkersuisoqarfik paasissutissiivoq.
Aalisarnermut periarfissat pitsaanerulersinniarlugit, periarfissanik agguataarinerup naligiinnerusumik ingerlasarnissaa anguniarneqarpoq.
Aalajangiinermi siunertaavoq periarfissanik naligiinnerusumik agguataarineq, taamaalilluni aalisarnermut tamanut pitsaanerusumik periarfissiissuteqartoq.
