Aalisartut Ane Hansenilu naapeqatigiinnerat kinguneqanngilaq

- Angusaqartutut oqarsinnaanngilagut. Kinguarsaaniarpalaarnermik taamaallaat tunngaveqarpoq, Johannes Heilmann oqarpoq.

Aalisartut piumasaraat katuffitsik naalakkersuisoqarfillu imminnut oqaloqatigiissatut siunissamullu tunngatillugu iliuusissanik eqqartueqatigiissasut.

- Aningaasaliissutit iluaniluunniit qanoq iliuuseqartoqarumanngippat allatut ajornaqaaq ulloqeqqanut iliuuseriniararput, akerliussutsimillu takutitsinissarput ingerlatissavarput, aalisartut oqarput.

Ane Hansen oqarpoq, ingerlaqqinnissaq aqqutissiueqatigiinnissarlu soqutigigaluaqalugu, kisianni oqaloqatigiumasani takkukkamik oqalulluni aallartiinnartuni oqaloqatiginnikkusukkunnaarsimasut.

- Ullumi assersuinissartik kisiat aalajangiusimanerarpaat, oqarpoq.

Naalakkersup erseqqissaatigaa naalakkersuisoq taamaallaat sulisinnaammat, inatsisit inatsisartut inatsisiliaat aammalu inatsisartut aningaasanut inatsisaat, tunngavigalugit.

- Ukiup tullissaanut inatsisartunut piumasaqaatissanik ilusilersueqatiginiaraluarpakka, taakkuli tusaajumanngilaat, oqaloqatiginnikkusunnatillu, Ane Hansen oqarpoq.

Umiarsualivik assersorneqalerpat Royal Arctic Linep umiarsuai, tunisiartortut allallu Nuup umiarsualianut tikinniartut aallarniallu tamarnik eqqorneqassapput.

- Akisussaaffik taanna aalisartut namminneq pigaat. Aamma ilisimavaat inatsisaatsuliorlutik. Pinngitsoortinniarlugu oqaloqatiginnikkusunnerigaluara ilassinnginnamikku namminneq qanoq iliuuseqaqqinnissartik alloriarfigisariaqarpaat, Ane Hansen oqarpoq.

Aalisartulli arfiniliullutik ataatsimiigiaqataasut ataatsimiinneq aallaqqaammulli equngasoqartoq oqaatigaat.

- Allaat naalakkersuisut siulimik suliaannik tukattunik tigusinersuartik tunngavilersuutiginiaraluarpaat.

Uagut tamakku pillugit agginngilagut. Aggerpugut naalakkersuisup akisussaasutut iliuuseqarnissaa kissaatigalugu, Johannes Heilmann oqarpoq.

Nuummi aalisartut akinik minnerpaaffiliinissamik kissaateqarlutik umiarsualivimmik assersuillutillu peqatigiiffimmik kattuffimmilluunniit tunuliaqutaqanngillat. Aningaasat akinik minnerpaaffiliinissamut aallerfigineqarsinnaasutut aalisartut oqaatigisaat tassaapput Royal Greenlandimut qanittukkut aningaasalissutaasut 500 millioni koruunit. Nalunaaqutaq ataatsimiit aamma KNAPK-p allaffiata silataaninngaanniit Namminersorlutik Oqartussat allaffissuata tungaanut ingerlaaqatigiittoqassaaq.