Aalisartut aatsitassarsiornermik suliaqalissapput
Aatsitassat nunatsinni inuussutissarsiutini pingaarnersanngussaaq, aalisartullu aatsitassalerinermut nuuttariaqassapput. Nalunaarusiaq saqqummersinneqaqqammersoq taama inerniliivoq.
Nunatsinni aningaasarsiorneq pillugu statsiministerimut siunnersuisartut ukiumoortumik nalunaarusiartik saqqummiuteqqammerpaat, pingaarnertullu inerniliinerat paatsungassutissaanngilaq:
- Aatsitassanik nukissiuutinillu iluaquteqarneq Kalaallit Nunaanni pingaaruteqartorujussuanngortussaavoq. Ilinniartitaanermut suliffeqarfeqarnermullu politikkimi tamanna ilanngunneqartariaqarpoq/ilaatinneqartariaqarpoq, nalunaarusiortut allapput.
Erngup nukinganik atuinissamut nunatsinni periarfissarpassuaqarpoq, gassimillu silaannarmik kissatsikkiartortitsisartumik CO2-mik aniatitsivallaarnaveersaarnissamik oqallittoqarnerata nalaani nunarput maanna pingaaruteqaleraluttuinnartoq oqaatigineqarpoq.
Aluminiumik iluaqutissarsiorneq nukissiuutinik atuinartorujussuuvoq, erngullu nukinganik atuinikkut nunatsinni aluminiumik iluaqutissarsiortoqarluarsinnaavoq. Nunatsinni aningaasarsiorneq pillugu statsministerimut siunnersuisartut nalunaarusiaanni tamanna atuarneqarsinnaavoq.
