Aalisartunut pisassiisarneq allanngortinniarneqalerpoq

Aalisartut pisassinneqartarnerat ukiup tulliani allanngortinneqarnissaa anguniarneqarpoq. Politikkikkut attuumassuteqanngitsut pisassiisalernissaat Aalisarnermut Piniarnermut Nunalerinermullu Naalakkersuisup Ane Hansenip sulissutigileruttorpaa.
Allattoq Mads Lynge
juulip 10-at 2009 16:03

Tassunga atatillugu pisasseeriaatsip allanngortinneqarnissaa misissuiffigineqarpoq.

- Ukiunut tulleriinnut atuuttussanik pisassiisoqartalernissaa aamma misissorneqarpoq, taamaasilluni aalisarneq uneqattaanngitsumik ingerlanneqartalissaaq, Ane Hansen oqarpoq, nangillunilu:

- Siunissaq eqqarsaatigalugu annertuumik pisariillisaanissaq suliniutigivarput aammalu siunertarinerpaajullugu aalisartumut iluaqutaasumik pisariitsumik, aammalu inuutissarsiornermi ataavartitsinerusumik ilusilersuinissaq, Ane Hansen oqarpoq.

Politikkikkut attuumassuteqanngitsut pisassiisalerpata piujuaannartitsinissaq siullermik aallaavigineqassasoq, aalisarnermut, piniarnermut nunalerinermullu naalakkersuisoq Ane Hansen oqarpoq nassuiaallunilu pisassiissutissat killissai naalakkersuisunit aalajangiiffigineqareeraangata taava politikkut attuumassuteqanngitsut maleruagassat akuerineqartut tunngavigalugit pisassisalernissaat ingerlanneqartalissasoq.

Politikkikkut attuumassuteqarnatik pisassiisalersussat qanoq inuttalersorneqassanersoq politikkikkut nalilersuiffigineqaqqaassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq