Aalisartoq: Nuunnermi aalisarsinnaatitaaneq killeqalersarpoq

Kujataani Qeqqaniluunniit aalisartoq Uummannamut Qeqertarsuulluunniit Tunuanut nuukkuni aalisartutut inuutissarsiuteqarsinnaajunnaartarpoq, naak tikitaanni akuersissutillit allamik inuuniuteqalernikuusut.

Marius Nielsen-Isaksen kujataani aalisartutut inuuniuteqarsimasoq siorna Uummannamut nuuppoq nuliani kommunemi socialimi pisortanngormat.

Sunaaffali kujataani qaleralinniartuugaluarluni Uummannami aalisartuusinnaanani, tassami massakkut ukioq kaajallareerpaa suli aalisarsinnaatitaanani.

Suna peqqutaanersoq Marius Nielsen-Isaksenip ima oqaatigaa:

”Tassa matoqqatinneqaraminngooq avataaninngaaneersut taamak oqalullutik tassa ungataaninngaaniit matoqqassasut takkuttut allat tamarmik mattunneqassasut.”

Marius Nielsen-Isaksen kujataani 36 fodimik pujortuleeraqarpoq, taannali atornagu, angallateeqqamik qaleralinniartarnissaminut qinnuteqaraluarami ullumimut itigartitaanikuuvoq.

Tamanna eqqumiiginartippaa tassami Aalisarnermut Pisortaqarfimmiit akuersissutilinnut allattorsimaffik pissarsiani naapertorlugu inuit 32-t Uummannami allamik suliffeqarlutillu inuutissarsiuteqartuupput, allaat ataaseq toqunikuulluni. Ilaat ruujorilerisuupput, ilaat kommunemi Drifteknikimi suliaqarlutik, børnehjemmemi sulisuullutik pisiniarfimmi sulisuullutik ilami allaat ilaat atuartuullutik.

Inuit 32-t aalisarsinnaanermut akuersissuteqartut sooq aalisartoq Kujataaneersoq Uummannami aalisarsinnaannginnersoq paasiniaratsigu Inuutissarsiornermut Pisortaq Hans Peter Mørch ilaatigut ima oqarpoq:

”Inatsisit taamaakkallartillugit periarfissaqanngilagut ataasiakkaat soorlu akuersissutinik peqartut aallerfigissallugit oqarluta aalisarunnaarsimasutit paasivarput taava uterteqqullugu taanna uagut piginnaatitaaffeqarfiginngilarput taamaattumik inuit namminneerlutik taanna pimittut pigigamikku ujartuiffigisinnaanngilagut soorlu utertinniarnissaanut taanna akuersissut allanut aalisalerusuttunut soorlu taamaalilluni aammaasinnaagaluartut nalunngikkaluarlutigu.”