Aalisarsinnaanermut akuersissuteqartut amerleriartut
Nunatta immikkoortuani 46-mi taaneqartumi, nunarput tamakkerlugu, sumiiffilli Qasigiannguaniit Kullorsuarmut pinnagu, qaleralinniarnissamut tamaani akuersissutaatillit ukiuni kingullerni amerleriarnerpaapput, ukiut marluk matuma siorna 340-usut ukioq manna marloriaatinngungajallutik 634-ullutik.
Aqutsiveqarfinni Qeqertarsuup Tunuani, Uummannaq aamma Upernavimmi, sumiffimmi 46-mik pineqartartumi akuersissutaatillit ukiuni kingullerni marlunni aamma amerleriarput. Umiatsiaararsortut qaleralinniarsinnaanermut akuersissutaatillit ukiut marluk matuma siorna 789-upput ukioq manna 812-iullutik.
AAMMA ATUARUK Enoksen: Aalisartut aalisarsinnaanermut akuersissuteqaannarlik
Nunatsinni aalisariutaatillit umiatsiaaraatillillu saarullinnik aalisarsinnaanerminnut akuersissutaatillit ukiut marluk matuma siorna 1.071-iusut ukioq manna 1.354-iupput, 283-inik amerleriarsimallutik.
Aalisarnermut politikkerineqartumut naapertuuttoq
Aalisarnermut, Piniarnermut Nunalerinermullu Naalakkersuisup Karl-Kristian Krusep taamatut ineriartortoqarnera nuannaarutigalugu oqaatigaa.
- Amerleriarneri nuannaarutigilluinnarpara, tamanna aalisarnermut politikkitta tunngavigilluinnarmagu, innersuussutigalugulu Naalakkersuisooqatigiit anguniarmassuk aalisarnermut akuersissutit suli amerlanerit tunniunneqartarnissaat.
Naalakkersuisooqatigiinnissamik isumaqatigiissut naapertorlugu piniarsinnaanermut allagartat aalisarsinnaanermullu akuersissutit kommuninit siunissami isumagineqalertussaapput.