Aalisarnermut Naalakkersuisoq akuliukkusunngilaq
- Oqaloqatigiinneq aallarteqqikkusunngikkaanni angusaqartoqarsinnaanngilaq, taamaattumik naapeqqittariaqarput, tamannalu inassutigiinassavara, Ane Hansen oqarpoq.
Taassuma erseqqissarpaa Great Greenlandip kiffartuussinissaamut isumaqatigiissutaanut siorna 26 million koruunit aningaasaliissutaasimasut, ukiormannalu aamma taama amerlatigalutik.
- Aningaasat taakku atorlugit Great Greenland ukioq manna amminik 55.000-nik pisisinnaavoq. Taamaaliorsinnaanngippat ammit akii appartinneqartariaqassapput. Ane Hansen oqarpoq, nangipporlu:
- Naligiissumik isiginnerusukkaanni piffinni ataasiakkaani ammit tigusinnaasat killilersornissaat periarfissaavoq, Aalisarnermut Naalakkersuisoq oqarpoq.
Ane Hansenip aappassaanik erseqqissarpaa, KNAPK aamma Great Greenland amminik tunisinerup unitsinneqarnera pillugu aaqqiissutissanik nassaarniartariaqarmata.
