Aalisarnermut ministeri tikeraarngaarpoq
Danmarkimi aalisarnermut inuussutissalerinermullu ministeri, Hans Christian Schmidt, atorfilittanilu, siullermeerluni nunatsinnut tikeraarpoq. Nunani allamiut nunatta avataani unioqqutitsillutik aalisartartut aalisarnermut ministerip tikeraarnerani pingaarnertut oqaloqatigiissutigineqarput, unioqqutitsillunilu aalisartartunut akiuiniarluni iliuuseqaqatigiinnissamik isumaqatigiissuteqartoqarpoq. Aalisarnermut naalakkersuisoq Finn Karlsen ima oqarpoq.
-Unioqqutitsillutik aalisartartut pingaartumik nunani avannarlerni ajornartorsiutaasorujussuupput, pisatik akikitsuaranngorlugit tunisaramikkik, taamaalillutillu sakkortoorujussuarmik unammillertuullutik. Taamaattumik taakku massakkut sakkortuumik akiorniarneqarput.
Finn Karlsen oqarpoq, ajornartorsiut tamanna nunatsinni annertunerusumik eqqartorneqarneq ajortoq. Nunatsinnut unioqqutitsisut nunalittannginnerat tamatumunnga peqqutaanerpaagunartoq Finn Karlsen eqqoriaavoq.
- Kisianni nunat amerliartuinnarput taakkununnga akiuiniartut, allaat orsersorsinnaanermut mattussinikuusut arlalissuanngorput.
Nunatta Islandillu akornanniittut Tunullu kujataaniittut suluppaakkat, unioqqutitsillutik nunatta avataani aalisartartunit ilaatigut nungunneqarsimapput, tamannalu pillugu akiuiniarneq sakkortunerulersinneqarniartoq. Finn Karlsen oqarpoq Akissaqarnerpugummi? Finn Karlsen ima akivoq:
-Akiuiniarnermut aningaasaliisinnaanngilagut, kisianni periarfissavut atorlugit aningaasaliinngikkaluarluta iliuuseqarniarpugut, assersuutigalugu tulaassiniartut usingiarsinnatitassanngillat orsersorniallu orsersorsinnaatitaassanatik.
Unioqqutitsillutik nunatta avataani aalisartartunut akiuiniarnissamut aalisarnermut ministeriaqarfik qanoq suleqataaniarpa? Tamatumunnga Aalisarnermut ministeri Hans Christian Schmidt ima akivoq:
- Nunat akiuiniartut ikioqatigiilluinnarnissaat pingaaruteqarpoq. Ikioqatigiit nunaminni namminneerlutik suliniutissanik pilersitsissapput, uagullu Danmarkimi russinik suleqatiginnillualernissaq suliniutigaarput, tassani aalisartunut tunngasut paasissutissat, soorlu aalisariutit qassiuppat kikkullu pisassinneqarsimappat? Tamakkununnga tunngasunik paasissutisseeqatigiittalernissaq anguniarparput. Unioqqutitsilluni aalisartarnerup kingunerisaanik pisassiissutinik ikilisaasariaqartarnerup naammagineerukkiartornera akiuiniarnermut tunngavioqataasoq Hans Christian Schmidt oqarpoq.
Nunatta avataani unioqqutitsilluni aalisartarneq nunat avannarliit aalisarnermut ministeriisa nunatsinni aappaagu ataatsimeeqatigiilerunik pingaarnertut oqaluuserissagaat aalisarnermut naalakkersuisoq Finn Karlsen aamma oqarpoq.
