Aalisarnermut ministeri lagkagimik kiinnamigut milorneqarpoq

Canadami aalisarnermut ministeriugaanni, puisinniarnermillu tapersersuisuulluni, misigisassarpassuaqarnarpoq. Canadami aalisarnermut ministerip, Gail Sheap, tamanna misigaa. Tassami sapaatip akunnerata uuma aallartilaarnerani oqalugiartilluni nuannerpallaanngitsumik misigisaqarpoq.

Oqalugiartumut tusarnaartut akornanniit akulloqquariarluni arnap Gail Shea lagkagemik, flødeskummimik ulikkaavissumik kiinaannaagut milorpaa, suna tamaat flødeskummerasaartilerlugu. Canadami nuna tamakkerlugu aviisimi, Globe and Mailimi, allaaserineqarpoq,

Gail Shea kanngusoqqullugu arnap nilliaffigisimagaa, ilaatigut ima: "Kanngusunniarit, aattaqaqisumik puisinniartarneq unitsinniarsiuk"! Arnaq politiinit qimagutitinneqarpoq.

Ministerip milorneqarnini eqqissisimasumik tiguvaa, oqarlunilu puisinniarneq tapersersortuassagini. Arnaq lagkagemik milorsisoq paasineqarpoq tassaasoq amerikamiu, Emily McCoy, uumasunik illersuiniaqatigiiffimmik PETA-mik illersuisoq.

Emily McCoyip iliuusaa Inuit Tapiriit Kanatamit ingerlaannaq assuarlerneqarpoq, tusagassiuutinullu nalunaarummik allagaqaramik ilaatigut allapput, lagkagi Haitimut nassiunneqarsimasuuppat akilersinnaanerusimassagaluartoq.