Aalisarnermut Inatsit nutarterneqartariaqarpoq
Aalisarnermut Inatsisip nutarterneqarnissaa pisariillisarneqarnissaalu qangali pisariaqalersimavoq. Naalakkersuisut qulaajaaneq pisariaqalersimasoq aallarnereerpaat naatsorsuutigalugulu ukiup matuma ingerlanerani Aalisarnermut Inatsit iluarsisaq Inatsisartunut saqqummiussinnaassallugu. Tamanna Naalakkersuisut 2007-mi Aningaasaqarnikkut Ingerlatsineq pillugu Nalunaarutaanni atuarneqarsinnaavoq.
Nunatsinni raajarniarnermi milliardilikkaanik kaaviiaartitsisoqaraluartoq ukioq manna Aningaasanut Inatsimmi raajanut akitsuummit isertitassat taamallaat 5 million koruunit missaannittussaapput. Aningaasat pissarsiat amerlineqarsinnaapput akitsuutit allaanerusut atorlugit imaluunniit pisassiissutit piffissamut killilimmut atuuttut nioqqutigineqartalersuuppata.
Aamma Nunatta Karsianit tapiissutaasartut ikilisinneqartariaqarput soorlu ilinniartitaanermut nuullugit, tassungalu atatillugu ESU allanngortinneqartariaqarpoq, akilersinnaanngitsumik aalisarnerup ingerlaannartinneqarneranut Nunatta Karsianit tapiissutit atorneqaqqunagit. Naalakkersuisut 2007-mi Aningaasaqarnikkut Ingerlatsineq pillugu Nalunaarutaanni Aalisarnermut Inatsisip allanngortinneqarneranut tunngasortaani tamanna atuarneqarsinnaavoq.
Naalakkersuisut isumaqarput soorlu aalisarnermik nakkutilliiinermut aamma ilisimatuut siunnersuisarnerannut aningaasartuutit nunani allanisulli aalisartunit akilerneqartalertariaqartut.
Aamma pisat 25 procentiinik tulaassisussaatitaaneq isumaliutigeqqissaarniarpaat.
- Tulaassisussaatitaaneq aningaasatigut pissarsiassaraluanik annikillisitsisarpoq, inuussutissarsiutip unammillersinnaassusianik killiliisarluni sulisussarpassuarnillu tigusisarluni. Tamannalu suliffinni allani sulisussanik amigaateqarnerup nalaani attanneqarsinnaanngilaq, Ajornartorsiut pineqartoq qaangerniarlugu kikkut tamarmik pisassiissutinik pisiumallutik neqerooruteqartalernissaat, taamaalillunilu pisassat aalittarinnerpaanut akiliuteqarumanerpaanullu tunineqartarnissaat Inatsit nutaaq aqqutigalugu qularnaaneqassasoq, nalunaarummi atuarneqarsinnaavoq.
Aammattaq sineriammut qanittumi avaataasiorlunilu aalisarnerup immikkoortinneqartuaannarnerat naliliivigeqqinneqartariaqartoq nalunaarummi tikkuarneqarpoq.
Aalisarnermut Inatsimmik allannguisoqarpat aalisariutit assigiinngisitaarnerusut pisassanillu pinnanniartarnermi unammilleqatuigiiffiusumi peqataasut amerlanerulernissaat Nalakkersuisut 2007-mi Aningaasaqarnikkut Ingerlatsineq pillugu Nalunaarutaanni atuarneqarsinnaavoq.
