Aalisarnermut inatsisissaq eqqartorneqarnerpaassagunarpoq
Taamaammat sapaatip akunnerani uani aalisarnermut naalakkersuisup, Inatsisartuni partiit tamaasa saaffiginiarpai, amerlanerpaat siunnersuutissaminut tapersersuinissaat anguniarlugu, Sermitsiaq allappoq.
Politikkikkut tapersersorneqarnissami saniatigut Ane Hansenip attaviginiarpai sulisitsisut peqatigiiffiat aamma aalisartut piniartullu kattuffiat, KNAPK.
Kattuffiit taakku marluk isumaqatigiissinnissaat ajornakusoortussaassagunarpoq, tassami kattuffiit taakku siunissami aalisarnerup aaqqissuunneqarnissaanut isumaat assigiinngitsorujussuummata.
Taamaammat aalisarnermut inatsisissap nutaap ilaannaata oqallisigineqarsinnaanera Ane Hansenip ilimagineruaa:
- Oqaloqatigiinneq aallartereerpoq. Inatsisissalli agguataarlugu oqallisigineqarnissaa pisariaqassagunarpoq, ukiaq manna Inatsisartut ataatsimiinnerinnaani naammassinagu. Siusippallaarporli massakkut taama isummissalluni, Ane Hansen Sermitsiamut oqarpoq.
