Aalisarnermut inatsisissaq aalisartunut kinguneqarnerlussinnaavoq

Naalakkersuisut aalisarneq pillugu inatsisissatut siunnersuutaat massakkutut isikkoqartillugu piviusunngussagaluarpat, aalisartunut pingaartumillu raajarnianut kinguneqarnerlussinnaavoq. Tusarniaavigineqartut marluk akissutaanni tamanna atuarneqarsinnaavoq.

Aalisarnermut inatsisitaassap sivisuumik atasinnaanissaa suliarilluagaasimanissaalu taakku piumasaraat.

Siunnersuut susassaqartunut tusarniaassutigineqaqqammerpoq, tusarniaavigineqartullu ilaannit, matumani pineqarput naalagaaffiup akuerisaanit kukkunersiuisartunit Deloitte-imit kiisalu Grønlandsbankenimit, siunnersuut amigaateqartutut nalilerneqarpoq.

Aalisarnermik inuussutissarsiorneq ukiuni kingullerni ajornartorsiuffilersimavoq, raajat akiisa appariartuinnarnerisa kingunerissaanik umiarsuaatileqatigiiffiit aningaasarsiornikkut atugaat killup tungaanut ingerlaviusimammata.

Pisassiissutinik naatsorsueriaatsit allannguteqarnissaat ilaatigut siunnersuutigineqarpoq.

Avataasiorlutik sinerissallu qanittuani aalisartunut pisassiissutinik piginnittutut tunineqartut pillugit qummut killissarititat taaneqartut aalisarnermut inatsisitaassatut siunnersuummi allannguuteqanngillat, nutaartaali tassaavoq toqqaannanngikkaluamik piginneqataanerup pisassiinermi ilanngunneqartalernissaa.

Allannguutissatut siunnersuummi siunniunneqartut piviusunngortinneqassappata umiarsuaatileqatigiit minnerit eqqorneqarnerlunnerusinnaasut Deloitte-p ilanngullugu oqaatigaa.

Inatsisissatut siunnersuut piviusunngortinneqassappat umiarsuaatileqatigiiffiit angisuut umiarsuaatileqatigiiffiit minnerit piginneqataaffigisatik taamaatiinnartariaqassavaat, umiarsuaatileqatigiiffiit minnerit eqqornerlunneqarnerannik kinguneqartumik:

- Umiarsuaatileqatigiiffiit minnerit taakku pisarialimmik aningaasaqarnikkut nukissaqarfiginngilaat namminneerlutik aningaasaliissutissanik pisariaqartunik pissarsinissaminnut.

Deloitte-imi Grønlandsbankenimilu tusarniaassutigineqarnermi saniatigut, siunnersuut pisortaqarfinni susassaqartuni tusarniaassutigineqarpoq, sulisitsisullu kattuffiinit nunattalu politimestereqarfianiit tusarniaassutigineqarluni.