Aalisarnermut ataatsimiititaliami amerlanerussuteqartut siunnersuut ilalerpaat

Aalisarneq pillugu inatsississatut siunnersuutip aalisartunut amerlanerusunut iluaqutaanissaa, Inatsisartuni ilaasortat aalisarnermut ataatsimiitsitaliami ilaasortat amerlanerussuteqartut neriuutigaat.
Allattoq Sara K. Jakobsen, Aviâja Kilime
aggustip 18-at 2017 16:06

- Aasiaat, Qasigiannguit, Kangaatsiaq, Sisimiut kujammullu raajarniartorpassuit isiginnaartuinnanngortitaanikuupput. Taanna aalisarnermut politikki, uagut oqartarnitsituut, eqqunngitsoq peqqutaalluni, Partii Naleraq sinnerlugu aalisarnermut ataatsimiititaliami ilaasortaq Henrik Fleischer, oqarpoq.

Raajartassiissutit avataasiortunut 57 procentii tunniunneqartarsimagaluartut, sinerissap qanittuani avataanilu aalisartunut assigiimmik avinneqartalernissaat siunnersuutaavoq.

AAMMA ATUARUK Suliffiit qassit pilersinneqassanersut nalunartoq

Siunnersuut 300 millionit koruuninik ukiumut annaasaqaataasinnaasoq siunnersuutip nassuiaataani allaqqavoq. 

Aalisarnermi suliffissat amerlanerulerpata aallaqqaammut suliffissaaleqisukinnerulissaaq, aammali inuiaqatigiit sinnerini suliffissaaleqisut piffissami ungasinnerusumi amerliartussasut, Naalakkersuisut allapput.

Amerlanerusulli aalisarnermit iluaquserneqarnissaat, Siumumeersumut pingaartuuvoq:

- Piginneqatigiiffiit marluk pingasulluunniit kisimik taamatut inissisimajunnaarlutik qangatut sinerissap qanittuani aalisarneq aammalu avataasiorneq eqqarsaatigalugu toqqaannartumik toqqaannanngittumillu 15 procentimik inissinnissaa aamma taanna pingaarutilerujussuartut uanga tunginninngaanniit isumaqarfigivara, Siumut sinnerlugu aalisarnermut ataatsimiititaliami ilaasortaq, Nikolaj Jeremiassen, partiiminik uannga siunersiuisimanngitsoq oqarpoq.

AAMMA ATUARUK Inatsisissatut siunnersuut nangiarnarpallaarpoq

AAMMA ATUARUK Siunnersuut tapersersoraluarlugu ernumasut paasisinnaagai

Inuit Ataqatigiinneersup, Hans Aronsenip inuit amerlanerusut aalisarnermit pissarsiaqartalernissaat ilimagaa, siunnersuummulli tunngavilersuutit sukumiinerusumik misissorneqarnissaat taassuma kissaatigaa. 

Assersuutigalugu kilisaatit pisatik aalisariutinut mikinerusunut naleqqiullugit isertitsissutiginerusarpaat. Kilisaatilli pisassatik ikilippata, akileraarutitigut nunatta sinneranut tunniussassaat ikilissapput:

- Piginneqatigiiffiit anginerit naatsorsuutaanni kusanartunik allassimasut akileraarutitigullu isertitaqaataasartut, taakkua inuiaqatigiinni siammasissumik atugaqarnernut tunngatillugu pitsaasuunersut aamma nalilersugassaapput, aalisarnermut ataatsimiititaliami ilaasortaq, Hans Aronsen, oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk