Aalisarneq pillugu isumaqatigiissuteqarput

Kalaallit Russillu aalisarneq pillugu 16-issaannik isumaqatigiissuteqarput, maanna 2008-mi kalaallit russit imartaanni aamma russit imartatsinni aalisarnissaat isumaqatigiissutaavoq.

Isumaqatigiissummi nutaami Kalaallit Nunaannut 2008-mut saarulliusaanik kullerinik pisassiissutigineqartut 2007-imut sanilliullugit amerlerialaarput, Ruslandimut qalerallit pisassiissutigineqartut aamma amerlerialaarlutik.

Suluppaakkanut ikerinnarsiortunut biologit siunnersuinerat tunngavigalugu russillu suluppaagarniarnerminni ilungersunartorsiornerat pissutigalugu Kalaallit Nunaata imartaani suluppaakkat ikerinnarsiortut Ruslandip pisassai 520 tonsinik ikileriarput.

Aalisakkat akii maanna atuuttut eqqarsaatigalugit Kalaallit Nunaata Ruslandillu akornanni isumaqatigiissummi Kalaallit Nunaannut iluanaarutaasumik koruunit 2 miliuunit missaannik pitsanngoriaateqarpoq.

Inuussutissarsiortut sinniisaasa kiisalu pisortaqarfiup Kalaallit Nunaata Ruslandillu akornanni isumaqatigiissut nunanut taakkununnga nalilerujussuartut nalilerpaat, 2008-mullu pisassiissutinik paarlaasseqatigiinneq naammagisimaarnartutut nalilerlugu.

Ruslandimut isumaqatigiissut kingusinnerusukkut akuerisassanngorlugu naalakkersuisunut saqqummiunneqassaaq.