Aalisarneq pillugu isumalioqatigiissitat suliartik naammassivaat
Aalisarneq pillugu ataatsimiititaliarsuarmi ilaasortat 17-iusut naggammik ippassaq ataatsimeeqatigiinnerminni innersuussutissatik tunngavissatillu naammassivaat. Isumaliuutissiissullu maanna nutserneqaleruttorpoq.
Allattoq Mads Lynge
Innersuussutit tunngavilersuutillu aalisarneq pillugu ataatsimiititaliarsuarmi ilaasortanit suliarineqartut aalisarneq pillugu inatsisissamut tunngaviliisussat februaarip aallartinnerani Aalisarnermut, Piniarnermut Nunalerinermullu Naalakkersuisumut tunniunneqassapput.
Aalisarneq pillugu ataatsimiititaliarsuarmi siulittaasoq Chresten Sørensen innersuussutinik Naalakkersuisunut ilaasortamut Finn Karlsenimut tunniussissaaq.