Aalisarneq pillugu inatsisissap oqaluttuassartaa

Aalisarneq pillugu inatsisissaq meeraavoq kissaataasoq, erniuniarnerali ajornaqisoq. Aalisarnerup iluarsaateqqinneqarnissaa sivisuumik noqqaassutigineqareersoq, inatsissatut siunnersuut septembarip 27-ani 2007 saqqummiunneqaqqaarpoq.

Kisianni siunnersuut saqqummiunneqarmat partiinit tamanit isornartorsiorneqarpoq, aalisarnermullu naalakkersuisuusup, Atassummeersup Finn Karlsenip, imminut tatiginnikkunnaarluni taasisoqarnera, taasinermik ataatsimik amerlanerussuteqarnikkut anigorpaa. Finn Karlsen tamatuma kingorna aalisarneq pillugu ataatsimiititaliarsuarmik pilersitsinialerpoq, tamanik misissuisussamik.

Ataatsimiititaliarsuup suliaanik saqqummiinissaq marsip arfineq pingajuani 2008 kinguartinneqarpoq, ukiami aatsaat pisussaanngorlugu. Ullulli pingasut qangiummata paasinarsivoq, ataatsimiititaliarsuaqanngitsoq. Pilersitsisoqarsimanngilaq.

Finn Karlsen tatiginnikkunnaarnermik illua tungiliuttunit aammaarluni taasissutigineqarpoq, aammali taanna anigorpaa.

Aalisarneq pillugu Ataatsimiititaliarsuup isumaliutissiissutaa 2009-mi februaarimi piareerpoq. Saqqummiunneqarmat Inuit Ataqatigiit aalisarneq pillugu oqaaseqartartuat, Ane Hansen, oqarpoq, Nunatta pissaqassusianut naleqqussartuaannartariaqartugut.

- Taamaattumik aamma aalisakkat ikilippata aalisartut aamma ikilisariaqassapput, Ane Hansen oqarpoq.

Ane Hansen qinersinerup kingorna aalisarnermut naalakkersuisunngorpoq. Aalisarneq pillugu inatsisissatut siunnersuut, Finn Karlsenip 2007-mi saqqummiussaa, Inatsisartut ukiaanerani ataatsimiinneranni, 2010-mi ukiakkut suliarisussanngortillugu.

- Aalisarneq pillugu ataatsimiititaliarsuup inassutai tusaaneqarsimanngillat, Ane Hansen oqarpoq.

Ippassarlu tusarparput, inatsisissaq kingumut misissoqqissaarneqassasoq.