Aalisarneq kisiat inuussutiginngilaat

Piniarneq, aalisarneq savaateqarnerlu kisimik Nunatsinni nunaqarfiit ataannarnissaanut qulakkeerinnittuujunnaarsimapput.

Inuussutissarsiutinit taakkunannga isertitat nunaqarfinni tamani isertitat taamaallaat tallimararterutaata arfinilerarterutata akornanniipput.

Nalunaarusiami Naalakkersuisunit suliakkiutaanni kisitsit taama oqaluttuarpoq. Nalunaarusiaq saqqummersoq tassaavoq "Kalaallit Nunaanni najugaqarfiit killiffiat - nunaqarfiit immikkut isigalugit".

Kisitsisitigut takuneqarsinnaavoq, inuussutissarsiutitoqqat taakkua nunaqarfinni ukiumut 150 millioni koruuninik isertitsissutasartut, nunaqarfinnilu isertitat tamakkerlutik 850 millioner koruunniusut.

Nunaqarfimmiut isertitaat paarlattuanik namminersorlutik sullissisunit pisortanilu sullissisuunermit annermik pisuupput, 600 millioni koruunit taakkunanngaannersuullutik. Takornariartitsinikkut aatsitassarsiortunilu nunaqarfinni isertitat suli killeqarput.

Ataatsimut isigalugu Nunaqarfinnit isertitat ikittuukkaajupput. Inoqutigiiaat pingasunik inuttallit pingajorarterutaat ukiumut 200.000 koruuninik isertitaqartarput, inoqutigiit taamannak inuttallit arfinilerarterutaat 100.000 koruunit ataallugit isertitaqartarlutik.