Aalisarneq inuussutissarsiutaavoq ilungersunartoq
Qaleralinnik misileraalluni aalisartitsinissaq Karl Lyberthimit qanittukkut eqqunneqartoq inuussutissarsiutip iluani annertuumik aalassassimaarutigineqarpoq. Taamatummi aaqqiisoqarnera aalisartut iluarinngilaat, tamannalu pissutigalugu Lyberthip isummani allanngoriataarpaa. Misileraalluni aalisartitsinissamnut pisassiissutigineqartut nalinginnaasumik pisassiissutinngortinneqarput, tamannalu inuussutissarsiummi nuannaarutigineqaqaaq.
-Tamanna aalisartunut qaammatini kingullerni marlussunni isertitaqarnissaminnut periarfissaqarnikuunngitsunut pisariaqarluinnalersimavoq. Ilaqutaasummi ilanngukkaanni inuit arlalinnik tuusintillit killilersuinernit sunnerneqarmata, Siumup politikkikkut oqaaseqartartua Per Berthelsen nassuiaavoq.
Aamma Nunatsinni aalisartut aalisakkanik allanik aalisarsinnaanerat annertuumik oqallisigineqarpoq, qaleralilli tassaavoq iluanaaruteqarfiunerpaasoq, nunatsinnilku aalisartut isertitassaminnik qulakkeerniarlutik aalisagaq taannarpiaq aalisassalluni orniginartinneruaat.
-Siumut isumaqarpoq, suliap tamatuma saniatigut kinguaariit paarlaattarnerat ilusilersortariaqartoq, aalisarnerup aalisarnermullu tunngasut ilisimasat siunissami aalisartuusussanut tunniunnissaat qulakkeerniarlugu. Tamannami nalorninartorsiorfiuvoq, inuusuttut aalisartunngorusukkaluit pissutsit ajorpallaarnerat pissutigalugu tamanna piviusunngortikkuminaatsimmassuk, Berthelsen isumaqarpoq.
Siunissami qanittumi sinerissap qanittuani aalisarnermut iliuusissatut pilersaarusiornissaq partiip anguniarpaa, inuussutissarsiut ingerlatsivinnit angisuunit taamaallaat ingerlanneqarani aalisartunik ataasiakkaanit aamma ingerlanneqalerluni.
-Taamaammat Siumut isumaqarpoq, aalisartut umiatsiaararsortut silarlutsillugu aningaasarsiorsinnaasanngitsut nalorninartorsiorneranni taperneqartarnissaat eqqarsaatigisariaqalersoq, Per Berthelsen nassuiaavoq.
