Aalisarneq inatsisartuni pingajussaanik
Aalisarnerup siunissami qanoq ingerlanneqarnissaa Inatsisartut ullumi oqaluuserissavaat. Naalakkersuisut Aalisarneq Pillugu Nassuiaataata Inatsisartuni oqaluuserineqarnera unitsinneqaqqattaarpoq, ataatsimiinnerit nalaanni ullormut oqaluuserisassanut marloriarluni ikkuneqarlunilu peerneqartarpoq. Ullumili iluatsissagunarpoq.
Aalisarneq pillugu nassuiaatip oqaluuserisassanit peerneqarnera siulleq qallunaatuumiit kalaallisuunngortinneqarnerani oqaaseqatigiit naapertuutinnginnerat peqqutaatinneqarpoq, tullianillu oqaluuserineqarnera aallartikkaluaannaq aamma kipitinneqarpoq paasineqarmat Nassuiaatip Royal Greenlandimut tunngasortaani nutserisimaneq aamma kukkuneqartoq. Tamanna pillugu Naalakkersuisunut illutungiliuttut tatiginnikkunnaarlutik nalunaarutigaat, tatiginnikkuunnaarnerlu taasissutigeqqullugu. Taasisitsinissamik piumasaqaat oqaluuserisap kinguartinneqarneranit pinngitsoortinneqarluni.
Aalisarneq Pillugu Nassuiaasiornermut, nunatsinni aalisarnermik inuussutissarsiuteqarnerup siunissami nukittorsarneqarnissaa tunngaviuvoq. Tassani ilaatigut raajat akikilligaluttuinnarnerat EU-llu allangortiterinerata nunatsinni aalisarnermut kinguneri ilanngunneqarput.
