Aalisariutit sinerissap qanittuani atorneqartartut aserfallassimavallaarnerarneqarput

Sinerissap qanittuani periarfissaqarnerullutik aalisarsinnaanissartik aalisartut kissaatigaat. Sinerissap qanittuani raajarniarneq pillugu sapaatip-akunnerata naanerani isumasioqatigiinnermi aalisartut taama oqariartuuteqarput.
Allattoq Louise M. Kleemann
apriilip 29-at 2008 13:13

Sinerissap qanittuani raajarniarnerup aaqqissuussaanera pillugu KNAPK aamma Royal Greenland assigiinngitsunik siorna novembarimi nalunaarusiami innersuussuteqarput, innersuussutigineqartullu amerlasuutigut aalisartunit taperserneqarlutik.

Aalisariutit sinerissap qanittuani atorneqartartut aserfallassimavallaarnerarneqarput, aserorterneqarnissaannullu tapiissuteqartoqartalernissaa ujartorneqarluni.

Sinerissap qanittuani raajarniarnermi angallatit angissusaat naapertorlugit pisassiisarnerit atorunnaarsinneqassapput, angallatillu sinerissap qanittuani aalisartussat takinerpaaffissaat 27 meteriussasoq siunnersuutigaat.

Raajaqassutsip appariartuinnarnissaa ilimagineqarmat, nungusaataanngitsumik aalisarnissaq pingaartinneqarpoq.

Ataatsimiititaliaq susassaqartunit ilaasortaaffigineqartoq isumasioqatigiissitsinerup nalaani pilersinneqarpoq, sinerissap qanittuani raajarniarnerup ataatsimiititaliamit malinnaavigineqarnissaa siunertaalluni.

Isumasioqatigiissitsinermi siunniussat piaartumik suleriaqqinnissami iliuusissatut ilusilerlugit Naalakkersuisunut saqqummiunneqarnissaat ataatsimiititaliap aamma naammassiniagassaraa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq