Aalisariuteqannginnera apeqqutaatinngilaat
Vittus Mikaelsenip radioaviisimut tamanna uppernarsarpaa, aalisariummillu attartornissaq siunertaralugu maanna pilersaarusiuleruttornertik oqaatigalugu.
Aalisariummik attartornissaq pillugu Danmarkimi, Savalimmiuni, Islandimi Kalaallillu Nunaanni periarfissarsiortoqaleruttorpoq, pisallu suliarineqaqqaariarlutik timmisartukkut avammut tunisassiarineqarnissaat siunniunneqarluni.
Tunisassiorfiulli sumi inissinneqarnissaa suli nalunarallartoq, Vittus Mikaelsenip oqaatigaa.
Tunisassiammi timmisartukkoorlugit nunanut allanukaanneqassappata aalisakkanik tunisassiorfiup Kulusummi inissinneqarsinnaanissaa periarfissaasinnaavoq. Siunissaq ungasinnerusoq eqqarsaatigalugu Tasiilami mittarfiliortoqarsinnaanissaa sillimaffigigitsik, Tasiilap borgmesteriata oqaatigaa, taamaassappammi Tasiilami tunisassiorfimmik ammaasoqarsinnaassammat.
Aalisartitseqatigiiffik, Tunumi Tsuuddii, inunnit tallimanit piginneqataaffigineqarpoq, tamarmillu Tasiilami najugaqartuullutik.
Aalisartitseqatigiiffimmik Tunumi Tsuuddii-mik ateqartussamik maajip aallaqqaataani nalunaarutiginnittoqartoq, Inuussutissarsiutinut Ingerlatsivinnullu Aqutsisoqarfiup ilisimatitsissutigaa, pisortatigoortumilli nalunaarsorneqarnera juulip aqqarnganni aatsaat naammassilluni.
