Aalisapiluttoqarnera pillugu nalunaarusiaq alla takkuppoq!
Aalisapiluttoqarneranik nalunaarusiaq alla aamma takkuppoq.
- Ingerlatsinikkut oqartussat tatiginanngillat, peqquserluttoqartarneralu unitsinniarneqartarsimanngilaq, nalunaarusiap inernilernerani ilaatigut taama allassimasoqarpoq.
Tamatumuuna siunnersuisoqarfiup Odensemiittup ateqartup: Sommer & Ogmundsson I/S-p nalunaarusiaq suliaraa.
Nalunaarusiami nutaami tassani ilaatigut allassimavoq, ukiorpassuarni aalisarnerup iluani anginaaraluni aalisapiluttoqartarsimasoq, tamannalu qanoq iliuuseqarfigineqartarsimanngitsoq.
Imalu nalunaarusiami ilaatigut allassimasoqarpoq:
”Ullumikkut raajarniarluni inuussutissarsiornermi ima periuseqartoqarpoq; raajanik aalisarsimasanit nalunaarsorneqanngitsunit isertuussisoqartarluni. Taamaalilluni raajanut fabrikkini tunisassiatigut tunngaviusut anginaarneqartarlutik.”
Siunnersuisoqarfiup nalunaarusiamini erseqqissarpaa,
Ingerlatsinikkut oqartussaasut ajornartorsiummik tamatuminnga aaqqiisinnaanngitsut, taamalu ”ingerlatsinikkut oqartussat tatiginanngitsutut nalilertariaqartut”.
Nalunaarusiami allattut naliliipput, aalisapilunneq tamanna unitsinneqanngippat, nunatsinni aningaasaqarneq akornuserneqarsinnaasoq.
Aalisarnermut Pisortaqarfiup pisortaa Amalie Jessen radioavisimut oqarpoq, Pisortaqarfimminni naatsorsuinerit suli utaqqigitik.
Amalie Jessen erseqqissaavoq, pisortaqarfiup nalunaarusiarititaa taanna, Namminersorneq pillugu Pisortaqarfiup peqquserlulluni aalisartoqarneranik nalunaarusiaanut attuumassuteqanngimmat.
