Nunani EU-mi ilaasortaasuni ministerit 25-t ippassaq ukiup tulliani Danmarkip eqqaani Kattegat-imi Skagerrakimilu aalisagartassiinissaminnik siunnersuuteqarput.
Aammattaaq ataatsimiinnerminni aalisagartanik misissueriaasissap nutaap eqqunneqarnissaa akuersissutigaat.
Misissueriaasissaq nutaaq taanna maajip aallaqqaataani atuutilersinneqassaaq taamaaliornikkut nunani tamalaani aalisakkat anngiortumik pisat killilersimaarneqarsinnaaleqqullugit.
Isumaqatigiissummi nunat pineqartut tassaapput; Norge, Rusland, Island, Kalaallit Nunaat, Savalimmiullu taamatuttaaq EU-mut aalisakkanik qerisunik eqqussisoqartillugu misissueriaaseq taanna aamma atorneqartassaaq.
Taamatuttaaq umiarsuit nunat allat talittarfiinut talinniartillutik namminneq nunaminni oqartussaasutik talinnissamut akuersissummik pissarsiffigeqqaarsimassavaat.
Pisat tunisassat uppernarsaatissaqartinneqanngippata umiarsualivimmut talinnissaq inerteqqutaasinnaassaaq.
-Taamatut misissueriaatsimik pilersitsivugut anngiortumik aalisarneq akiorniarlugu. Taamaalilluta unioqqutitsiniat nunallu tamalaat maleruaqqusaannut ataqqinninngitsut nakkutiginerulersinnaanngorpavut, Inuussutissaqarnermi ministeri Hans Christian Schmidt taama oqarpoq.