Unioqqutitsilluni aalisarneq kalaallinit danskinillu akiorneqarniarpoq. Nunat avannarlermioqatigiit suleqatigalugit russit akiuiniarnermi peqataalersinniarneqarput.
Tamannali Norgemi aalisartut kaffiaanit Fiskerlaget-imit sivisussangatinneqarpoq.
Fiskerlaget-imi sinniisuutitat Norgemi radiomut oqarput Norgemi oqartussat russinik sunniisinnaasorissagunik sianiippallaarujussuassasut.
Barentip imartaani russit kilisaataat 40-t ukioq manna saarullittassinneqarnissaannik akuerineqarput – naak ukiuni siuliini pisassaminnik arlaleriarlutik sippuisaqattaartarsimagaluartut.
Umiarsuit arlaleriarlutik unioqqutitsillutik aalisarsimasut aamma pisassinneqaqqipput.
Norgemi oqartussat russit suleqatiginiarnissaasa ajornakusoornerat ilisimavaat.
- Russit suleqatigiuminaatsuunerat misilittagaqarfigaarput tamanna namminneq aamma eqqartorusunneq ajorpaat, Norgemi aalisarnermut pisortaqarfimmit Einar Ellingsen Norgemi radiomut oqarpoq.