Aalisakkat qillertuusarmiut peqqinnarput
Aalisakkalli qillertuusamiittut, soorlu saarulliup suai, tunfiski ammassassuillu tomatsauce-lerlugit peqqinnarpat?
- Aap, nerisassat pillugit Københavnip Universitetiani lektori Karsten Olsen taama akivoq.
Aalisakkat qillertuusamiittut aalisakkanut pisaarlaanut naleqqiullugit peqqinnarnerunngikkaluarput, assigiinngissutaalli annertuallaanngitsoq, Karsten Olsen aviisimut Politikenimut oqarpoq.
Ajoqutaasinnaasorli ataaseq taassuma erseqqissaatigaa, tassalu aalisakkap tikka.
Tunfiskiuppat, ammassassuugaluarpat saarulliilli suai qillertuusamiitsinneqartut asiusinnaapput oqussunnilersinnaallutillu.
- Tamanna pissusissamisuuginnarpoq, taamaammanuna aalisakkap uuliaa poorneqartartoq, aalisakkalli qillertuusamut poornikut nerisarissallugit ajornaquteqanngilaq, aalisakkalluunniit qerisut aamma nerissallugit ajornaquteqarani, Karsten Olsen nittartakkamut videnskab.dk-mut oqarpoq.
