Aalisakkat perlukuisa atoqqinneqarsinnaanerat misissuiffigineqarpoq
Royal Greenlandip aamma siunnersuisoqatigiit Carl Bro peqatigalugit, aalisakkanik suliffissuarni perlukut allallu igitassat atoqqinneqarsinnaanerat akilersinnaanersoq misissuiffigaat.
septembarip 13-at 2007 06:29
-Royal Greenland A/S-ip pissusissamisoortutut isigaa, avatangiisit eqqarsaatigalugit aalisakkanik imarmiunillu allanik tunisassiornermi perlukut, eqqaannarnagit, allatut atorluarneqarsinnaanerat periarfissaanersoq ujartussallugu, taamaalilluni pinngortitamut eqqaaneq minnerpaaffimmiilerniassammat, Royal Greenlandimi Ineriartortitsinermut pisortaq, Robert Møller, Inussuk-mut oqarpoq.
Suliniummi anguniarneqarpoq, soorlu aalisakkat niaquisa, amiisa, saanikuisa uuliaasalu atoqqinneqarsinnaanerisa misissuiffiginissaat. Tunisassiornermi aalisakkat perlukui raajallu qalipaat ullumikkut fiskemeliliarineqartarput.
