Aalisakkat nutaat nunatta imartaanut anngupput
Aalisakkat tamakkua allanartut aalisariaatsinik nutaanik periarfissiipput. Kisianni aalisartut, aalisartitseqatigiiffiit, biologit politikerillu peqatigiinnissaat pisariaqarpoq.
Tassami tamakkuninnga aalisarsinnaanissamut pisinnaatitaalissagaanni peqatigiinnissaq pisariaqartoq, Royal Greenlandip sulisunut atuagassiaani Navigatiomi atuarneqarsinnaavoq.
Nunatta imartaani ukiuni 25-ni raajarniarnermik inuussutissarsiuteqartoq, ukiunilu kingullerni Akamalimmi naalagaasoq, Jógvan Tróndarson, atuagassiamit oqaloqatigineqarpoq.
Amerlasuut suleqatigiinngippata, nunatsinni aalisartitseqatigiiffiit ataasiakkaat aalisakkanik nunatsinni takussaalersunik pisassinneqarsinnaanissaat ajornakusuussaqisoq taassuma aarleqqutigaa.
- Aalisakkanik nunatta imartaanut takkuttalerlutik nerisarnermikkut alliartortoqarpat, taava nunatsinneersut inatsisit malillugit tamakkunannga aalisarsinnaatitaapput. Kisianni aalisakkat takkuttaraluarpataluunniit, tamakkua aalisarneqartalersinnaassanersut aamma apeqqutaavoq. Tassami nunat allat Atlantikup avannaaniittut tamaasa unammilleraluaraanni, kisimiikkaanni, kisimiinneq malunnarluinnarsinnaavoq, Jógvan Tróndarson oqarpoq.