Aalisakkat akiisa minnerpaaffilerneqarnissaat periarfissaqanngilaq

Aalisarnermut Piniarnermut Nunalerinermullu Naalakkersuisup Ane Hansenip ippassaq KNAPK ataatsimeeqatigigamiuk taama ilisimatitsivoq.

- Ukioq manna siunertamut tassunga aningaasanik immikkoortitsisoqarsimanngilaq, aamma inatsisitigut tunngavissaqanngilagut, Ane Hansen radioaviisimut oqarpoq.

Taassuma aalisartunut oqilisaataasinnaasunik suliniutinik assigiingitsunik massakkut sulissutiginnittoqarnerarpaa.

- Royal Greenlandip Arctic Green Foodillu tunitsivii 16-it matoqqasut ammaqqinniarlugit oqaloqatigiinnerit massakkut ingerlanneqarput. Assersuutigalugu Qeqertarsuatsiaani aalisakkerivik ammaqqinneqarpat aalisartut Nuummut tunisiartortaraluartut nunaqarfimminni tunisisinnaalissapput, Ane Hansen oqarpoq.

Umiarsuaq tunitsivik massakkut Kangaatsiap eqqaaniittoq Nuup eqqaanut nuuneqassasoq ilanngullugu pilersaarutigineqarpoq.

Nuummi aalisartut piniartullu peqatigiiffiat qanittukkut sioorasaaruteqarpoq aalisakkat akii minnerpaaffilerneqanngippata tallimanngorpamiit Nuummi umiarsualivik assersorneqalissasoq, tassani sulineq tamaat unitsillugu.

Pilersaarut piviusunngortinneqassanersoq pillugu ataatsimeeqatigeeqqissallutik, Nuummi aalisartut piniartullu peqatigiiffiani tamanna pillugu oqaaseqartittagaq Johannes Heilmann oqarpoq.