Aalisakkanik tunisisinnaaneq killilersorneqarpoq
Nuummi aalisartut aalisaganeruttorfiani tunitsivissaqarniarnikkut akimmisaartitaapput. Saarulliit takkusimaaleruttortut tunisisinnaaneq killilersorneqarpoq. Aamma nipisaat suaannik tunisineq maaji qiteqquttorli matuneqartoq, Nuummi aalisartut Piniartullu Peqatigiiffianni siulittaasoq Nikolaj Heinrich oqarpoq:
Suannik pisiortorneq upernaaq kingusinaartumik aallartikkami, nappartanik ajornartorsiortuarnerup kingunerisaanik, maaji qiteqqutiinnartoq unitsinneqarami aammalu saarulliit ilaatigut bundgarninik pisarineqartalernerat tunngavigalugu, taamaalilluni maajip qulingata nalaani suanniarneq unitsinneqartaraluartoq siusinaartorujorujussuarmik unitsinneqarpoq. Taassumalu kinguneraa umiatsiaaraanerusut eqqarsaatigalugit aalisarnerup unittuujusavinnera.
Nikolaj Heinrich taama oqarpoq.
Royal Greenlandimi ineriartortitsinermut Pisortaq Robert Møller ilisimatitsivoq, nipisaat suaannik tunisineq allatut ajornartumik nappartassaaleqineq pissutigalugu unitsittariaqarsimagitsik, naallu nappartat nutaat tikikkaluartut, saarullinnik tigooqqaaneq ingerlaannassaaq - saarullinnik suannillu ataatsikkut tunisassiortoqaqqusaanngimmat.
Nuummi suliffissuarmut saarulliit 20 tonsit ullormut tulaanneqarsinnaapput, ullormulli 11 tonsiinnaat qerinasuartinneqarsinnaammata, aalisartut tulaassiniartut ilaanni utaqqisariaqartarput.
Radioavisimit paasiniaanitsinni ilisimatinneqarpuguttaaq privatit “Kapisillit Food A/S” kilisaammik Savalimmiunit attartukkamik saarullinnik ullormut 40 tonsinik tigusisinnaasumik kangerlummi tunitsivileeqqammersut.
Aporfissat qangali politikerinit iluarsiivigineqarsimasariaqaraluartut, Nuummi Aalisartut Piniartullu Peqatigiiffiani siulittaasoq Nikolaj Heinrich oqarpoq.
- Pissutsit ilungersunartorujussuupput. Aalisakkat utersaariartulernerat, ukiut marlussuilli matuma siornatigut aalisartut nilliaatigilerpaat, ilaatigut tunitsiviit eqqarsaatigalugit piorsaasariaqarneq piareersimasinnaanerlu nilliaatigalugit, oqarpoq.
Aalisartut kissaatigisatik aallaavigalugit oqariartuuteqartarput, ulloq mannali tikillugu sumiluunniit nunatsinni tuninisinnaaneq piorsaavigineqanngitsoq, Nikolaj Heinrich erseqqissaavoq.
-Umiarsuarnik tikisitsillattaarneq eqqaassanngikkaanni annertunerusumik aalisartunut periarfissiisoqanngilaq. Ajornartorsiut aallartilluariivippoq. Qularnanngilaq ukiuni tulliuttuni annertusigaluttuinnassalluni.
Nuummi Aalisartut Piniartullu Peqatigiiffianni siulittaasoq Nikolaj Heinrich taamaattumik neriuppoq, siunnersuutitik KNAPK-mut tunniussatik kinguneqarluarumaartut.
- Aalisakkat tikiutereerput, politikerit takusariaqalerpaat nunarput annerusumik avammut tunisassiorsinnaalersoq, Nikolaj Heinrich oqarpoq.
